Ers 2022, mae Canolfan Polisi Cyhoeddus Cymru a’r Bartneriaeth Cymunedau Dyfeisgar (RCP) – fforwm cenedlaethol ar gyfer sefydliadau cyhoeddus a sefydliadau’r trydydd sector sy’n cefnogi ac yn datblygu dyfeisgarwch a llesiant cymunedau – yn cydweithio ar brosiectau er mwyn deall yn well beth yw rôl cydweithio amlsector wrth gefnogi gweithredu cymunedol sy’n gwella llesiant.
Adolygiad tystiolaeth ar gydweithio amlsector i wella llesiant cymunedol
Roedd prosiect cyntaf Canolfan Polisi Cyhoeddus Cymru gyda’r Bartneriaeth Cymunedau Dyfeisgar yn cynnwys dau gam:
- Adolygiad tystiolaeth ar sut mae cydweithio amlsector yn dylanwadu ar weithredu cymunedol a llesiant. Roedd yr adroddiad yn cynnwys astudiaethau achos yn seiliedig ar ymarfer, llenyddiaeth lwyd o’r Deyrnas Unedig, a llenyddiaeth academaidd wedi ei gyhoeddi ers dechrau pandemig Covid-19.
- Gweithdy gyda rhanddeiliaid allweddol o bob rhan o Gymru i drafod prif ganfyddiadau’r adolygiad tystiolaeth, archwilio perthnasedd y canfyddiadau i wahanol gyd-destunau ymarfer a pholisi, ac ymgorffori profiad ac arbenigedd sy’n seiliedig ar ymarfer yn y sylfaen dystiolaeth.
Fe wnaethom gyhoeddi sawl canfyddiad allweddol o’r prosiect ymchwil hwn:
- Y Prif Adroddiad: ‘Cydweithio amlsector i wella llesiant cymunedol’ casglu ynghyd ganfyddiadau’r adolygiad tystiolaeth a’r gweithdy gyda rhanddeiliaid allweddol o bob rhan o Gymru.
- Crynodeb o dystiolaeth cyn y pandemig: cyhoeddwyd adolygiad, sy’n cyd-fynd â’r gwaith hwn, gan Brifysgol Leeds Beckett i roi rhagor o gyd-destun i ganfyddiadau’r prif adolygiad ac mae’n cynnwys gwybodaeth ehangach ar yr hyn sy’n gwneud cydweithio amlsector yn effeithiol wrth gefnogi gweithredu cymunedol a llesiant.
- Fframwaith Gweithredu: adnodd a ddatblygwyd fel man cychwyn i adnabod camau gweithredu er mwyn cryfhau neu sefydlu cydweithio amlsector mewn gwahanol gyd-destunau.
Datblygu offer neu adnodd i alluogi cydweithio amlsector
Yng ngham nesaf gwaith Cysylltu Cymunedau Canolfan Polisi Cyhoeddus Cymru, rydym ni’n cydgomisiynu datblygu adnodd a fydd yn galluogi defnyddwyr i greu, gwella neu gynnal cyfleoedd i gydweithio rhwng sawl sector. Bydd yr offer/adnodd hwn yn adeiladu ar ganfyddiadau ein prosiect ymchwil diwethaf, a’n Fframwaith Gweithredu.
Mae Canolfan Polisi Cyhoeddus Cymru ac RCP yn ymgymryd â’r gwaith hwn mewn ffordd gyd gynhyrchiol. Rhwng mis Rhagfyr 2024 a mis Ebrill 2025, fe gynhaliodd Canolfan Polisi Cyhoeddus Cymru gyfres o weithdai dylunio 90 munud gyda rhanddeiliaid – gan gynnwys defnyddwyr posibl – a oedd yn gyfle i brofi a chadarnhau’r galw am y gwaith hwn, ac adnabod y wybodaeth allweddol sy’n sail i’r comisiwn, yn ogystal â’n helpu ni i greu Grŵp Llywio i oruchwylio camau nesaf y gwaith ar y cyd. Ynghyd â’r gweithdai hyn, fe gynhaliodd y tîm adolygiad desg o’r offer a’r adnoddau sydd eisoes yn bodoli, a chyfweliadau i helpu i siapio’r adnodd.
Mae’r broses cydgomisiynu wedi dechrau ym mis Mai 2025, a’r bwriad yw canfod partner addas i gydweithio â Chanolfan Polisi Cyhoeddus Cymru, Grŵp Llywio’r prosiect, yr RCP, a rhanddeiliaid eraill er mwyn creu prototeip, profi, a chyflwyno’r offer/adnodd hwn.
Os hoffech chi gymryd rhan neu ddysgu rhagor, cysylltwch â ni: info@wcpp.org.uk